Чӑвашла вӗренес килет-и? Чӑваш чӗлхи вӗренмелли сарӑм хута янӑ. Ӑна телефон ҫине уҫласа илме пулать.
Сарӑма Павел Шкаликов программист шухӑшласа кӑларнӑ. Унта лексикӑпа грамматикӑна вӗренме, вӑл е ку сӑмаха тӗрӗс мӗнле каламаллине пӗлме, тӗрлӗ хӑнӑхтару пурнӑҫлама пулать.
Сарӑмра онлайн-словарь те пур. Ӑна программист, Чӑваш халӑх сайчӗн редакторӗ Николай Плотников хута янӑ.
Шупашкарти аэропорта пӗтӗмпех юсаса ҫӗнетнӗ хыҫҫӑн ӗҫлеттерсе яни пирки эпир унччен пӗлтернӗччӗ-ха. Кун пирки халӑх тетелӗнче те хыпарлакансем йышлӑ пулчӗҫ. Анчах ҫак йӗркесен авторӗ унта пулнӑ май тепӗр япалана асӑрханӑ.
Аэропортра халӗ чӑваш чӗлхи тивӗҫлӗ вырӑн йышӑнать. Алӑксем ҫинче икӗ чӗлхепе: вырӑсла тата чӑвашла — ҫырса хунӑ.
Унран та ытларах: авиапассажирсем валли калакан пӗлтерӳсене те унта халӗ вырӑсла ҫеҫ мар, чӑвашла та пӗлтереҫҫӗ.
А.Г. Николаев ячӗллӗ аэропортӑн пресс-служби ҫак йӗркесен авторне пӗлтернӗ тӑрӑх, ӳлӗмрен самолётсенче те чӑвашла хыпарлама пуҫласшӑн.
Чӑваш Енре нумай функциллӗ центрсенчи терминалсемпе сайтсенче чӑвашла калаҫакан ИИ-пулӑшуҫӑ хута ярасшӑн. Ку ӗҫе икӗ ҫулта тума палӑртнӑ.
Ку сервис ҫынсене онлайн-режимра консультаци пама пултарӗ. Вӑл ҫынсенчен килнӗ ыйтусене хӑйех тӗрӗслӗ. Ку вӑхӑта перекетлеме май парӗ.
Кунсӑр пуҫне искусствӑлла технологисемпе центрӑн пӗрлехи колл-центрӗнче калаҫӑва чӑвашла куҫарнӑ ҫӗрте те усӑ курӗҫ.
Максим Кузнецовӑн «Эпӗ чӑвашла калаҫатӑп. Чувашский язык с нуля: самоучитель для начинающих» ятла кӗнеки пичетленсе тухнӑ. Ӑна Тутар кӗнеке издательстви кӑларнӑ, хальлӗхе унта кӑна сутӑнать.
Максим – Раҫҫей ӑслӑлӑхӗсен академийӗн Хусанти ӑслӑлӑх центрӗн ӑслӑлӑх ӗҫченӗ, ҫамрӑк ӑсчах-лингвист, полиглот, куҫаруҫӑ, журналист, поэт. Унӑн унччен те кӗнекесем тухнӑ: «Русские черты в вепсском синтаксисе» (2018), «Коренные народы Ленинградской области и их современные праздники» (2021), «Татарский язык с нуля: самоучитель для начинающих» (2022), «Elo» (веп чӗлхипе ҫырнӑ сӑвӑсен пуххи, 2023).
Максим чӑвашла 2023 ҫулхи ака уйӑхӗнче кӑна вӗренме пуҫланӑ. Унччен вӑл чӑвашла пӗр сӑмах та пӗлмен. Икӗ уйӑхра Максим грамматикӑна вӗреннӗ. Чӑвашла вӗренме пулӑшакан кӗнекене вӑл 2023 ҫулхи ҫӗртмерен пуҫласа 2024 ҫулхи ака уйӑхӗччен хатӗрленӗ. Ҫав тапхӑрта вӑл чӑвашла пач пӗлменнисем валли кирлӗ чӑваш грамматики пирки пысӑк ӗҫ ҫырнӑ. Калӑпӑшӗ пысӑк пулнӑран кӗнеке евӗр пӗр пайне кӑна кӑларма йышӑннӑ.
Максим пӗлтернӗ тӑрӑх, кӗркунне Хусанта, Шупашкарта, Ӗпхӳре тата Санкт-Петербургра кӗнеке хӑтлавне ирттерме палӑртнӑ.
Шупашкарти 40-мӗш вӑтам шкулта ӗҫлекен Алекснадр Степанов шкул ачисем валли «Хевте» уйлӑх (лагерь) йӗркелессине пӗлтернӗ. Уйлӑха «Хавал» ушкӑнпа пӗрле пуҫарса янӑ.
Вӑл кӑҫалхи утӑ уйӑхӗн 25-мӗшӗнчен пуҫласа ҫурла уйӑхӗн 1-мӗшӗччен «Алый парус» ача-пӑча санаторийӗнче иртӗ. Унта 20-25 ачана кӗтеҫҫӗ. Ку — тӳлевлӗ мероприяти. Пӗр ачашӑн 18,7 пин тенке тӳлемелле). Унта 8-16 ҫултисем хутшӑнма пултарӗҫ .
«Ертӳҫисен ушкӑнне хальлӗхе 4 ҫын кӗрет: Алпарух (Александр Блинов, пуҫлӑх), Айтар (Александр Степанов), Уйӑхпи (Вероника) тата Анна (Хусан федераци университечӗн студентки)», — пӗлтернӗ Александр Марсович халӑх тетелӗнчи хӑйӗн страницинче.
Программа вара ҫӑпларах пулӗ: кашни кун пӗрер сехет чӑваш чӗлхи тата ҫавӑн чухлех кашни кун пӗрер сехет пӗр-пӗр ют чӗлхе (тӗслӗхрен, акӑлчан, турккӑ, итальян чӗлхисем - ачасем хӑйсем суйлӗҫ) вӗренӗҫ.
Унсӑр пуҫне ачасем валли чӗлхе вӑййисем, ӑсталах лаҫҫисем ирттерӗҫ.
«Хавал» университетри пек эпир те ачасене кунӗпех чӑвашла калаҫтарма тӑрӑшӑпӑр», — хыпарлана Александр Степанов.
Ҫыхӑнмалли телефон: +7 952 022 9054. Телеграмри контакт: @cv_haval21 е @alparuh.
Халӗ Ҫӗнтерӳ кунӗнче «Катюша» юрра чӑвашла та шӑрантараҫҫӗ. «Пуринчен малтан» телеграм-канал пӗлтернӗ тӑрӑх, Пенза облаҫӗнчи чӑваш хӗрӗсем ӑна шӑпах чӑвашла юрлаҫҫӗ.
Ҫак йышра – Кристина Мефодьева, Татьяна Щербакова, Виктория Сенькина, Ольга Грудкина. Вӗсем – Пенза тӑрӑхӗнчи чӑвашсен культурине, йӑли-йӗркине тата чӗлхене упраса хӑварас енӗпе йӗркеленӗ «Эткер» организаци хастарӗсем.
Видеопа ҫак ҫак каҫӑпа паллашма пулать: https://t.me/nikamran
Чӑваш чӗлхи кунне Калининград облаҫӗнче те уявланӑ. Кун пирки «Пуринчен малтан» телеграм-канал пӗлтерет.
Уяв Полесье районӗнчи Ҫӗнӗ Ялта иртнӗ. Унта хӑнасем тӗрлӗ тӑрӑхран пухӑннӑ. Хӑнасене
вырӑнти тата Мускаври ансамбльсем юрӑ-ташӑпа савӑнтарнӑ. Чӑвашсене Калининград облаҫӗнчи ингушсен, якутсен, бурятсен, тутарсемпе пушкӑртсен тата ытти халӑхсен наци культура автономийӗн представителӗсем уявпа саламланӑ.
Юлашкинчен уявра «Катюша» юрра вырӑсла тата чӑвашла юрланӑ.
Раҫҫей Федерацийӗн Геройӗ Н.А.Петров ячӗллӗ Елчӗкри пӗтӗмӗшле пӗлӳ паракан вӑтам шкулта Чӑваш чӗлхи кунне халалласа уяв иртнӗ. Кун пирки асӑннӑ тӑрӑхӑн сайтӗнче хыпарланӑ.
Уяв шкул директорӗн Л.Н.Васильеван саламӗпе пуҫланнӑ. Вӑл тӑван чӗлхене юратма, хамӑр чӑваш пулнипе мӑнаҫланма чӗнсе каланӑ.
Уявра тӗрлӗ юрӑ-кӗвӗ янӑранӑ. 1 «б» класра вӗренекен Екатерина Чернова юрлакан юрра куракансем уйрӑмах тӑвӑллӑн алӑ ҫупса йышӑннӑ, хӗрсен илемлӗ ташши те куракансене килӗшнӗ.
Кӑҫал Аслӑ Ҫӗнтерӗве тунӑранпа 80 ҫул ҫитнӗ май вӗренекенсем хӑйсем ҫырнӑ сӑввисене вуланӑ.
Г.Н.Волков ячӗллӗ Аслӑ Елчӗкри пӗтӗмӗшле пӗлӳ паракан вӑтам шкулта Чӑваш чӗлхи кунне тивӗҫлипе уявланӑ. Мероприятие Надежда Хушкина вӗрентекен уҫнӑ. Вӑл чӑваш чӗлхи пуян та илемлӗ, янӑравлӑ та ҫепӗҫ, паха та асамлӑ пулнине; Иван Яковлев ячӗ чӑваш халӑхӗшӗн яланах хисеплӗ те чыслине, унӑн чапӗ халӑх хушшинче паянхи кун та иксӗлменнине мӑнаҫланса палӑртса хӑварнӑ.
Елчӗк районӗн сайтӗнче хыпарлана тӑрӑх, ачасем чӑваш писателӗсем ҫырнӑ сӑвӑсене илемлӗ каласа итлекенсене савӑнтарнӑ. Ҫӗнтерӗве 80 ҫул ҫитнине халалласа Петӗр Хусанкайӑн «Мунча шӑрши» сӑвви тӑрӑх лартнӑ инсценировка лартнӑ.
Чӑваш чӗлхине сарас, унӑн сумне ӳстерес, тӑван халӑх культурине хисепе хума вӗрентес тӗллевпе культура тата вӗренӳ учрежденийӗсем ҫеҫ мар, кирек мӗнле хастар та хӑйӗн тӳпине хывма пултарать.
Шупашкар хулинчи халӑхӑн социаллӑ ыйтӑвӗсене тивӗҫтерекен центр «Контактри» хӑйӗн страницинчен чӑвашла ӳкерсе илемлетнӗ турилккесене выляттарать. Черетлӗ вылява паян, Чӑваш чӗлхи кунӗнче, пӗтӗмлетнӗ. Хальхинче турилккене Светлана Гордеева ҫыравҫӑ тата ӳнерҫӗ ҫӗнсе илнӗ. Илемлӗ турилккене унччен Крымра пурӑнакан арҫын патне ӑсатнӑ.
«С Днём чувашского языка! Тӑван чӗлхене юратар, манар мар, туссем! Ачасене те чӑвашлах вӗрентер. Пӗр чӗлхе — пӗр ӑс, икӗ чӗлхе — икӗ ӑс, виҫӗ чӗлхе — виҫӗ ӑс», — тесе ҫырса хунӑ учреждени конкурса пӗтӗмлетнӗ май.
-19.7 °C